Umugenzuzi Mukuru wungirije w’Imari ya Leta yatangije amahugurwa ayobowe n'abagenzuzi baturutse mu Bwongereza

Umugenzuzi Mukuru wungirije w’Imari ya Leta (DAG), Patrick Habimana, ku wa 31 Kanama 2026, yatangije ku mugaragaro amahugurwa y’iminsi itanu ku Igenzura ry’Imikorere (Performance Audit), atangwa n’Urwego rw’Igihugu rw’Ubugenzuzi bw’Imari ya Leta rw’u Bwongereza (UK National Audit Office) ku bufatanye n’Urwego rw’Umugenzuzi Mukuru w’Imari ya Leta w’u Rwanda (OAG Rwanda), binyuze mu bufatanye bw’impande zombi.

Aya mahugurwa agamije kongerera abitabiriye ubumenyi ku buryo bukoreshwa mu igenzura ry’imikorere, hibandwa by’umwihariko ku isesengura ry’impamvu muzi z’ikibazo (root cause analysis).

Mu ijambo rye ritangiza amahugurwa, DAG Habimana yagaragaje akamaro kayo mu guteza imbere ireme n’ingaruka z’ibikorwa by’Ubugenzuzi bya SAI Rwanda, agira ati" Nk’Ikigo cy’Igihugu gishinzwe Ubugenzuzi Bukuru bw’Imari ya Leta, duhora dushaka kunoza ireme, akamaro, imikorere n’ingaruka z’ibikorwa byacu by’Ubugenzuzi. Ubugenzuzi bukomeye bwubahiriza amategeko n’amabwiriza ndetse n’Ubugenzuzi bushingiye ku Mikorere ni ingenzi mu gutanga icyizere, guteza imbere kubazwa inshingano, no kunoza imicungire y’umutungo wa Leta n’itangwa rya serivisi.

Yavuze ko Gahunda y’aya mahugurwa izibanda ku ngingo z’ingenzi zigize inzira y’Ubugenzuzi, zirimo gutegura gahunda y’ibikorwa by’Ubugenzuzi n’uburyo ibyihutirwa mu igenamigambi bigira uruhare mu guhitamo ingingo z’Ubugenzuzi bushingiye ku Mikorere. Hazanagereranywa uburyo OAG Rwanda na UK NAO bikoresha.”

Yakomeje ati "Aya mahugurwa azibanda ku gutegura Ubugenzuzi hagamijwe kugira impinduka zifatika, kugena neza imbibi z’Ubugenzuzi, kumenya impinduka zitezwe, gushyiraho ibipimo byo gusuzuma bishingiye ku bimenyetso, kumenya abafatanyabikorwa no kubasesengura, ndetse no guhitamo uburyo bukwiye bwo gukora Ubugenzuzi.

Byongeye kandi, abitabiriye bazakomeza kunoza ubumenyi n’ubushobozi mu gusesengura umuzi w’ibibazo, gukusanya no gukoresha ibimenyetso bifite ireme, no gutegura ibyifuzo by’Ubugenzuzi bigamije gukemura ibibazo kandi bifite akamaro. Ibi bizafasha kugira ngo Ubugenzuzi butarangira ku kugaragaza intege nke gusa, ahubwo bugire uruhare mu kuzana impinduka zifatika kandi zifite akamaro.”

Yashishikarije abitabiriye amahugurwa kugira uruhare rugaragara mu biganiro, imyitozo ngiro no kungurana ibitekerezo n’ubunararibonye. Yabasabye gukoresha aya mahirwe atari mu kunguka ubumenyi n’ubushobozi bushya gusa, ahubwo no mu gusuzuma uburyo basanzwe bakoramo no gutekereza ku buryo bushya bwafasha kurushaho kunoza ireme n’ingaruka z’Ubugenzuzi bwubahiriza amategeko n’amabwiriza ndetse n’Ubugenzuzi bushingiye ku Mikorere.

Yanashimiye Urwego rw'Umugenzuzi w'Imari rw'Ubwongereza, umufatanyabikorwa wa SAI Rwanda, ndetse n’abahugura baturutse muri urwo rwego, ku bufatanye bwa tekiniki bakomeje kugirana na SAI Rwanda no ku ruhare rwabo mu kongerera ubushobozi abakozi ba OAG Rwanda.