Umugenzuzi Mukuru w’Imari ya Leta yagejeje ku Nteko Ishinga Amategeko Raporo y'Ubugenzuzi ya 2025

Umugenzuzi Mukuru w’Imari ya Leta, Alexis Kamuhire, kuri uyu wa 6 Gicurasi 2026 yagejeje ku Mitwe yombi y’Inteko Ishinga Amategeko, Raporo y’Igenzura ry’umwaka warangiye ku itariki ya 30 Kamena 2025. Igenzura ryakozwe kuri 96% by’amafaranga yose yakoreshejwe ku ngengo y’imari mu nzego za Leta 252, hatangwa raporo z’igenzura 297 ku nzego zagenzuwe.

Iyi raporo igaragaza ko hakomeje guterwa intambwe mu micungire y’imari mu nzego zose za Leta. Uburyo bw’igenzura rikumira bukomeje gutanga umusaruro, kuko bwatumye hagaruzwa miliyari 1 na miliyoni 470 Frw. Mu mwaka wabanje hari hagarujwe miliyari 9 na miliyoni 300 Frw yari agiye kwishyurwa bitari ngombwa.

Umugenzuzi Mukuru w’Imari ya Leta yagize ati  “Umubare w’inzego za Leta zabonye Ntamakemwa ku kuzuza ibitabo by’ibaruramari wariyongereye ugera kuri 97% mu 2025, uvuye kuri 94% mu 2024. Inzego zabonye Ntamakemwa ku iyubahirizwa ry’amategeko zariyongereye zigera kuri 83% zivuye kuri 75% mu 2024. Ku bijyanye no kubahiriza ihame ryo gukoresha neza umutungo wa Leta, 79% by’inzego zagenzuwe zabonye Ntamakemwa ugereranyije na 66% mu 2024. Amafaranga akoreshwa mu buryo budakurikije amategeko yaragabanutse aba miliyoni 600 Frw ugereranyije na miliyari 2 na miliyoni 4 Frw yagaragaye mu 2024.”

Yonegeyeho ko “ Gushyira mu bikorwa inama zitangwa n’ubugenzuzi ni ingenzi. Byageze kuri 65% bivuye kuri 60% mu 2024. Urugero rugaragara ni ivugururwa ry’inzu zangijwe n’imirimo yo kubaka urugomero rw’amashanyarazi mu Karere ka Kirehe. Igihe cy’ubugenzuzi, byagaragaye ko uburyo zavugururwaga butari bukwiye. Ubugenzuzi bwasabye ko hubakwa inzu nziza kandi zikomeye. Ni muri urwo rwego, ku bufatanye n’abandi bafatanyabikorwa hubatswe inzu nshya 80 zigezweho zigenewe imiryango yagizweho ingaruka n’uwo mushinga”. Guhera mu ntangiriro za Gicurasi 2026, abo izi nzu zagenewe batangiye kuzituramo.”

Umugenzuzi Mukuru w’Imari ya Leta kandi yagaragaje ko hari ibibazo bimwe na bimwe bikeneye gukosorwa byihutirwa, birimo gutinda gutangira imishinga ifite ingengo y’imari, gukoresha ku kigero gito ingengo y’imari yagenewe imishinga, imitangire y’amasoko n’imicungire y’amasezerano, kudindira kw’imirimo y’ubwubatsi, imitungo idakoreshwa ndetse no gutinda gutanga serivisi ku baturage.

Mu gukemura ibyo bibazo, Umugenzuzi Mukuru w’Imari ya Leta yasabye inzego bireba kwihutisha ishyirwa mu bikorwa ry’imishinga kugira ngo igere ku ntego zayo ku gihe, gutanga serivise nziza ku baturage, ndetse no kuzuza inshingano.

Urwego rw’Ubugenzuzi Bukuru w’Imari ya Leta bukomeje kwiyemeza guteza imbere kuzuza inshingano no gukoresha neza umutungo wa Leta mu nyungu z’iterambere ry’igihugu n’imibereho myiza y’Abaturarwanda.